Pusa
Mga Karakter: Benny, 42 taong gulang, manedyer ng bangko
Jun, 21 taong gulang, estudyante ng law
Lugar :
Sala ng bahay sa isang subdibisyon
Panahon :
Kasalukuyan
Alas
kuwatro kuwarenta i singko ng hapon.
(Ang
ingaw ng mga pusa ay maririnig. Matinis.
Mabagsik. May lalagabog. Papasok
si Jun mula sa kaliwang bahagi ng entablado na may dala-dalang sako na may
lamang mga pusa. Maririnig ang ingaw ng
mga pusa. Walang tigil na ingaw. Tatalian ni Jun ng lubid ang sako. Mapapangiti siya. Hila-hila ang sakong lalabas siya sa kanang
bahagi ng entablado. Patuloy pa rin ang
ingaw ng mga pusa. Walang tigil na
ingaw.)
Alas
singko diyes ng hapon.
(Papasok
si Benny mula sa kanang bahagi ng entablado bitbit-bitbit ang kanyang attache case. Parang babagsak ang kanyang mga balikat. Hihinto sa harap ng sofa. Hahagurin ng tingin ang mga nakatumbang upuan
at nakakalat na mga diyaryo. Matagal
niyang titingnan ang mga ito. Lalabas siya sa kaliwang labasan ng entablado. Ilang sandali ay papasok din siya at aayusin
ang magulong sala: itatayo ang natumbang
upuan, ilalagay sa tamang lugar ang lamesita, pupulutin at ilalapag sa lamesita
ang mga diyaryo, ilalagay sa gitna ng lamesita ang ash tray. Uupo.
Ilang sandali lang at muli siyang tatayo at hahakbang sa likuran ng sofa. Magtitimpla ng kape. Uupo.
Ilalapag sa lamesita ang kape.
Bubuklatin ang diyaryo. Paulit-ulit. Iinom ng kape. Kukunin sa bulsa ang lighter. Ilalabas ang isang kaha ng sigarilyo. Sisindi ng sigarilyo. Bubuklatin ang diyaryo. Paulit-ulit. Iinom ng kape. Hihitit ng sigarilyo. Ilalapag ang diyaryo sa lamesita. Bubuklatin ang diyaryo. Papasok mula sa kanang bahagi ng entablado si
Jun. Mapapatingin sa maayos na lamesita.
Didiretso sa kaliwang labasan ng entablado.
Bubuklatin ni Benny ang diyaryo.
Paulit-ulit. Iinom ng kape. Hihitit ng sigarilyo. Bubuklatin ang diyaryo. Paulit-ulit.
Papasok si Jun mula sa kaliwang bahagi ng entablado na may bitbit na mga
libro, nakasuot ng bagong polo pero halata pa ring basa ng pawis. Dire-diretso ang kanyang paghakbang palabas
ng kanang bahagi ng entablado.)
BENNY: Nasaan na
ang ating mga pusa, Jun?
JUN: Itinapon ko
na, Tito.
BENNY: Bakit?
JUN: Hindi ko
gustong makita sila dito na palaging nag-aaway, nag-aagawan ng pagkain,
naghahabulan sa ating sala---dito pa sa sofa natutulog...tumatae kahit saan,
nag-iingaw tuwing gabi -- hindi nila ako pinatutulog, Tito.
BENNY: Hindi ka ba
naawa sa kanila? (Hihitit ng sigarilyo si Benny)
JUN: Bakit sila!? Naawa
ba sila sa akin? Ako ang tagatrapo ng
kanilang mga tae.
Iniistorbo
pa nila ang aking pagtulog!
BENNY: Di ba ikaw
din ang nagdala sa kanila dito?
JUN: Oo.
BENNY: At ikaw rin
ang magtataboy?
JUN: Hindi ko naman
kasi naisip ang perwisyong maibibigay nila sa akin (saglit na
katahimikan)
pito silang walang tigil sa pag-ingaw sa tabi ng daan, lahat payat, iniwan ng
kung sinong walang awang... dalawa lang
sa kanila ang aking nadala dahil may bitbit akong bigas sa isang kamay... silang
dalawa.... silang kaawa-awa ang hitsura ikumpara sa limang naiwan... silang
aking isinalba---
BENNY: Na ngayo'y
iyong itinaboy?
JUN: Wala na kasi
akong alam na ibang gawin, Tito. (hahakbang palapit sa bintana)
Noong
una, dalawa lang sila, tapos naging apat... naging pito... walo... sampu...
BENNY: Trese.
(Hihitit ng sigarilyo si Benny)
JUN: Oo. (sandaling
katahimikan; maririnig ang ingaw ng mga pusa) Noong una
nasasayahan
pa ako dahil tuwing sa darating ako at maghuhubad ng sapatos, naglalaro sila sa
aking mga paa. Sa paggising ko meron
akong hinihimas-himas habang nakikinig ng balita sa radyo. (mapapatigil)
Ngunit nang kalaunan... nang dumami na sila, nawala na ang aking
pagmamahal. Makita ko lang ang isa sa
kanila agad-agad na aakyat ang dugo sa aking ulo... palagi na lang silang
nakakatikim ng sipa.
BENNY: Pagod ka
lang siguro. (Papatayin ang sigarilyo, kukunin at bubuklatin ang
dyaryo,
bubuklatin nangpaulit-ulit)
JUN: Siguro. (uupo at
sasandal sa sofa; ilalagay ang kanang paa sa kamay ng silya)
Siguro
pagod lang ako sa kaiisip. (titingala sa kisame). Iniisip ko kasi kung talaga bang Law ang
gusto kong kurso. Iniisip ko kung sino
ang nararapat kong kaibiganin. (biglang
tatayo at haharapin si Benny). Natatakot
ako, Tito. Hindi ko alam kung ano ang
gagawin ko sa buhay ko. Hindi ko alam
kung magiging maligaya ba ako kung makakatulong ako sa aking kaptwatao.
BENNY: Di ba ikaw rin ang pumili ng kursong
iyan?
(Tatayo si Jun at hahakbang
sa may likuran ni Benny.)
JUN: Sinunod ko lang naman ang sinabi mo na ang taong binigyan ng talino ay
JUN: Sinunod ko lang naman ang sinabi mo na ang taong binigyan ng talino ay
kailangang magbayad
sa pamamagitan ng pagtulong sa kanyang kapwatao, (hahakbang si Jun papuntang
bintana, babalikid kay Benny) 'Yan ang rason kung bakit gusto kung maging
abogado.
BENNY (pasigaw): At
'yan rin ang rason kung bakit andito ka ngayon!
(Katahimikan. Walang gagalaw sa kanilang dalawa.)
JUN (mahinang
boses): Oo. (maririnig ang ingaw ng mga pusa) Dalawampu’t isang
taon
na ang nakalipas nang iwan ako sa pintuan ng bahay mo na nakabalot sa
lampin. Iniwan ng hindi nakikilalang ina---at
hindi na talaga gustong magpakilala pa. (ilalagay
ang mga kamay sa tiyan na parang nakakaramdam ng pananakit.) Kilala ka na noon sa radyo kaya---
BENNY: Kaya hindi
nagkamali ang 'yong ina sa pagpili ng tao na aaruga sa iyo,
magpapakain
sa 'yo, magbibihis sa 'yo, makapag-
JUN: Makapagpaaral
sa akin.
BENNY: Pinapag-aral
kita, oo pinapag-aral kita. (katahimikan) Namumuhay lang
akong
mag-isa noon. Walang ama,walang ina,
walang mga kapatid. Dahil sa ‘yo
nag-aral akong muli. Iniwan ko ang
trabaho sa radyo. Ang aking suweldo sa
radyo ay kulang para sa ating dalawa.
Nakapagtrabaho ako sa bangko. Pagkalipas ng limang taon, manedyer na ako. Hindi ko alam kung pasasalamatan kita o
magagalit ako sa 'yo dahil inagaw mo ang aking kaligayahan.
JUN: Ang iyong
pagsasakripisyo para sa aking kapakanan.
Paano ko malilimutan e
makailang
beses mo nang naikuwento ‘yan. Lalo na nitong
mga nakaraang araw!
BENNY: Kailangan
kong gawin 'yan dahil alam ko kung anong klaseng lipunan
meron
tayo. Alam ko rin kung anong klaseng
henerasyon andidiyan ka ngayon. (sisigaw) Ilang beses ko na bang sabihin sa 'yo
na huwag kang sumama sa kanila!
JUN: Tinuruan mo akong
sumunod?
BENNY (mahinang
boses) : Oo.
JUN: Tinuruan mo
akong sumunod pero nalimutan mo akong turuang mag-isip.
Nalimutan
mong meron din akong sariling pag-iisip.
BENNY (malakas na
boses): Kung hindi kita tinuruang sumunod, e saan ka na sana
Ngayon!? Hindi ka na sana nakatuntong ng Law. Maniwala ka sa akin, nadaanan ko na ang
dinadaanan mo ngayon.
JUN: Pero naging
maligaya ka ba?
BENNY (malakas na
boses): Wala ka na sana rito ngayon kung hindi ko sinunod ang
aking
puso! (saglit na hihinto) Oo hindi ako
naging maligaya dahil pinatay ko ang aking kaligayahan pero ang kapalit ng
nawalang kaligayahan ay isang buhay.
JUN: Buhay na tulad
rin ng sa 'yo. Buhay na walang kaligayahan.
(Matagal na
katahimikan. Hahawakan ni Benny ang diyaryo at titingin sa
may bintana.)
BENNY: Ilang taon
ka na, Jun?
JUN: Beynte uno.
BENNY: Bata ka
pa. Marami ka pang dapat malaman sa
mundo. (iinumin ang kape,
dahan-dahang
ilalapag sa lamesita ang tasa) Nang andiyan ako sa edad na 'yan gusto ko ring
gawin ang gusto kong gawin - ang lumaban.
Oo lumaban ako, pero wala akong nagawa.
Malakas silang masyado, Jun.
JUN (may pagtataka):
Sino ‘sila’, Tito?
BENNY: Sila ay
hindi mo makikilala. Kahit ako hindi ko
sila kilala. Pero
mararamdaman
mo sila, Jun. Mararamdaman mo ang
kanilang paglapit, ang kanilang unti-unting pagsakal ng iyong leeg, ang
kanilang unti-unting pagpatay sa iyo.
JUN (tatayo): Hindi ko maintindihan ang mga pinagsasabi mo.
BENNY: Dahil beynte uno ka pa lang. Maiintindihan mo lang kung marating mo na
ang
tamang edad... pero sa oras na maintindihan mo ay hindi mo na makukuha ang
kanilang mga kamay sa iyong leeg. Doon
mo na mararamdaman ang pagdating ng iyong kamatayan---ang iyong dahan-dahang
kamatayan.
JUN (pasigaw): Hindi!
Hindi sila magtatagumpay sa akin! Lalabanan
ko sila.
Lalabanan
ko sila hanggang sa huling pusnga ng aking ginhawa!
(Mapapatitig
si Benny kay Jun. Mapapatitig siya sa
malamig na kape)
BENNY: Malakas
sila, Jun. Wala pa akong kilala na nakatalo sa kanila.
(Ilalapit
Benny ang mukha sa tasa ng kape, si Jun naman ay tatayo at walang tigil na
itataas-ibababa ang kamay.)
JUN (pasigaw): Ako! Ako pa lang ang mananalo laban sa
kanila! Ako pa lang.
(mapapangiti)
Mula ngayon isasara ko na ang aking puso at ang gagamitin ko na lamang ay ang
aking isipan. Mula ngayon ako ay
mabubuhay kasama ang aking sarili lamang!
Mabubuhay akong hindi umaasa sa tulong ng ibang tao. Mabubuhay ako sa buhay na aking pinili. (tatawa)
BENNY: Anong ibig
mong sabihin, Jun?.
JUN: Hindi na ako
magpapatuloy ng aking pag-aaral, Tito. (tatawa) Hindi na ako mag-
aabogado. Aalisin ko na rin sa aking isipan ang
pagtulong.
BENNY (mapapaupo): Kahit
mamatay pa siya?
JUN: Oo, Tito. Oo,
kahit mamatay pa siya. Hindi ko
isasakripisyo ang sarili kong
kaligayahan
kapalit ng kanyang buhay. Oo, Tito, kung
ako lang ang naging ikaw, hindi ko pupulutin ang sanggol na iniwan sa pintuan
ng aking bahay. Pababayaan ko na lang
siyang mamatay!
BENNY
(nagmamakaawa): Hindi ‘yan ang ibig mong sabihin.
JUN: Oo, Tito,
pababayaan ko na lang siyang mamatay. (hahakbang at uupo sa sofa,
iinumin
ang malamig na kape) Pababayaan ko
siyang mamatay dahil alam kong siya ay isa lamang sa libu-libong tao na aking
masasalba...anawnser ka noon sa radyo, Tito.
Mahal mo ang iyong trabaho. (guguluhin
ang mga nakalagay sa lamesita: diyaryo,
ash tray, sigarilyo, lighter) Kayat
hindi ka mabibili ng kung sinong gustong dumihan ang iyong pagkatao. Kayat wala silang lakas na pahintuin ka sa
pagsasabi sa mga tao tungkol sa kanilang mga masasamang ginagawa. Isipin mo kung ilang libong tao ang masasalba
mo kung maibubulgar mo sa radyo ang perang kinurakot ng mga empleyado ng
gobyerno. Wala ka na sanang makikitang
mga batang busdik ang mga tiyan. Wala ka
na sanang makikitang tulay na napuputol at kinakahulugan ng mga pampasaherong
sasakyan. Wala ka na sanang makikitang
namamalimos sa daan. Wala ka na sanang
maaamoy na baho sa ating mga tindahan.
Wala ka na sanang makikitang motorsiklong natutumba sa ating lubak-lubak
na daan. Wala ka na sanang makikitang
dilim, Tito! (katahimikan. Uupo si Jun at tatayo naman si Benny. Titigan ni Benny ang ginulong mga bagay sa
lamesita. Aayusin ang mga ito. Maririnig ang ingaw ng mga pusa. Uupo si Benny.
BENNY: Akala ko
ba'y itinapon mo na sa malayo ang ating mga pusa?
(Guguluhin
ni Jun ang mga bagay-bagay sa lamesita at tatakbo sa may
bintana)
JUN: Nagkamali ako.
(lilingunin si Benny) Ngayon ko lang
nalaman na kapag ang
isang
tao ay lalayo nang lalayo sa mga taong nangangailangan ng kanyang tulong,
lalapit nang lalapit sila sa kanya.
Tulad ng mga pusang iyan na itinapon ko sa malayong lugar.
BENNY: Pero kahit
takpan mo pa ang kanilang mga mata maaamoy ka pa rin nila,
Jun.
JUN: Pero alam ko
na kung anong gagawin ko sa kanila. Alam
ko na!
BENNY: Ano?
(Titingnan
ni Jun si Benny at tapos ay nakangising tatakbo palabas ng entablado. Maiiwan si Benny na nakatingin sa pintuang
nilabasan ni Jun. Tatapunan niya ng
tingin ang mga nakakalat na mga bagay-bagay. Dahan-dahang pupulutin ang
lighter. Uupo sa sofa. Pipitikin ang lighter. Aapoy ito.
Tititigan ang apoy. Magsisindi ng
sigarilyo. Hihitit. Kukunin sa bibig. Ipapalabas sa ilong ang aso. Hihitit uli.
Biglang mapapahinto. Dali-daling papatayin
ang sigarilyo sa ash tray at papasok sa kanang labasan ng entablado.
Papasok si Jun na tumatawa. Duguan ang suot na damit at pantalon.)
JUN: Tito! Tito Benny! Tito, malaya na ako. (tatawa) Nakuha ko na ang kanilang
mga
kamay sa aking leeg. Nanalo ako laban sa
kanila, Tito! Nanalo ako! (tatawa nang
malakas; lalabas sa kuwarto si Benny bitbit ang .38 kalibreng baril sa kanang
kamay.) Tito nagkamali ka nang sabihin
mong matatalo nila ako. Nanalo ako, Tito! (tatawa) Nanalo ako! (tututukan siya ng baril
ni Benny) Ti--Tito, a-a-ano ang ibig sabihin ni---(babarilin ni Benny si Jun at
matutumba ito.)
BENNY (habang nakatitig sa baril): Hindi lang
ikaw ang nanalo, Jun, ako rin. Ako
rin,
Jun! Ako rin! Nanalo rin ako! (tatawa nang malakas habang
tinititigan ang baril sa kamay)
Eksakto alas
sais ng gabi.a
(Itututok
ni Benny ang baril sa ulo. Mamamatay ang ilaw.
Maririnig ang putok ng baril at maririnig ang pagbagsak ng katawan sa
sahig.)
Walang komento:
Mag-post ng isang Komento